Eph 6 | KMG | STEP | Naru motec ŋoŋe Wofuŋte erâ neŋgoc mamacfâc-ŋeŋic jaŋere dâŋ reŋkenšepieŋ. Izi hata biaŋne.

Ephesians 6

Neŋgoc mamac â naru motec jaŋere dâŋ

1 Naru motec ŋoŋe Wofuŋte erâ neŋgoc mamacfâc-ŋeŋic jaŋere dâŋ reŋkenšepieŋ. Izi hata biaŋne. 2 “Go neŋgoc mamac jahecge sâsec-jofazemec”, i sâcmutâc dâŋ fekicne, erâ biŋedâŋ-ticne šiŋuc šuhuckerâ mukicne: 3 “Iŋuc erâ mâreŋko dameŋ šora juhâc qâhâmocmu.” 4 Mamac ŋoŋe naru motecfâc-ŋeŋic aaric bâfuanšipiŋte wiac kosa mi ejarenšepieŋ. Ŋoŋe mitio jaza bâtiŋ â uŋ sawaŋ ejarehuc soŋaŋ-jopahapie sokanšepieŋ.

Ŋicbomboŋ â kiŋaŋ qaqa jaŋere dâŋ

5 Kiŋaŋ qaqa ŋoŋe mâreŋ ŋicbomboŋfâc-ŋeŋic araŋ bajarehuc, maŋŋeŋiczi qâzuc foha, Kristo ecneŋgopieŋ tinac, mana mezac ehuc micjeŋic reŋkenšepieŋ. 6 Ŋoŋe ŋicbomboŋfâc-ŋeŋic maizi qambaraŋ ejarepie honec-ŋopapie biaŋkeocte mâcne, nâŋe Kristore kiŋaŋ qaqa, iŋuc muhuc Anutuzi hata muwec i maŋafec jaha âtenšepieŋ. 7 Ŋic jaŋere manasuhuc aricne, Wofuŋte manasuhuc gie-ŋeŋic tatakic tâmiric banšepieŋ. 8 Ŋoŋe manaeŋgopieŋ, moc e kiŋaŋ qaqa me ŋicbomboŋ juhuc wiac biaŋne ehuc juocmu, e Wofuŋzi okacne sâc ijaha bazucneocmu.

9 Erâ ŋicbomboŋ ŋoŋe kiŋaŋ qaqafâc-ŋeŋic iŋuc jaha ehâmo-jarenšepieŋ, ehuc mu imac mi ejarenšepieŋ. Erâ šiŋuc mananšepieŋ: Kiŋaŋ qaqa â ŋicbomboŋ ine sambâŋko Wofuŋ wirec-ŋeŋic jukac, e ra rowec ware rowec mi focnekac.

Râsi mi hohonene jueŋgopieŋ

10 Mutarahuc mupe: Wofuŋtao roweckepie tâpiri sâko-ticnezi ŋoŋerao fotâcneme qaboc-ŋeŋichec junšepieŋ. 11 Erâ Anuturaonec sându maro šika wiac ro barâ juhapie Sataŋzi rucko râsi fisi-ŋareme hâbi-ŋeŋic rorâ jâpenšepieŋ. 12 Ŋoŋe manaŋgopieŋ, nâŋâc râsi sahac biuchec jaŋehec šika qaqa mi eeŋgopeneŋ, aricne, ŋicbomboŋ sâko â momori sanaŋ, dameŋ ši dapâc fokac irec guriŋ bapa, demoŋ sâqocne sambâŋ rurumaŋko jueŋgopieŋ, jaŋe râsi enâreeŋgopieŋ. 13 Irec Anuturaonec sându maro šika wiac ro bajuhuc šika dameŋko qiŋ herâ domahapie râsi jaŋe bâipiec-ŋoparâ wisenšepieŋ.

Momorire wiac bajuzo

14 Ŋoŋe kecšiŋuc domanšepieŋ: Dâŋ fâri qizecnezi umbika-ŋeŋic eme jomanšepieŋ, kiŋfâsâczi maruku-ŋeŋic eme rufanšepieŋ, 15 wamare Biŋebiaŋ bašawiehuc badomanšepieŋ, izi kikehuhu hepie hume âte sanaŋkeŋgopieŋ ezejec. 16 Erâ neŋgocne sâko ine mamanasiŋzi maro-ŋeŋic eme dameŋ sâc he bâfeŋnerâ domahapie sâqocne runere šoc tepe moteczi kisowarierâ hâpozejec. 17 Erâ wâc aeŋdu šâŋene bâbâpiaŋ hepie huzejec, â Mâroraonec šika, Anuture dâŋ hâcne, i bajunšepieŋ. 18 Ŋoŋe šâfo sâc Mârore tâpirio Wofuŋ šušuhuc jaha numucnehuc wâsickenšepieŋ, erâ qâoma mi ehuc rucjaric-ŋeŋic banšepieŋ, erâ hae sâc mitiŋic guru jaŋere nunumu gie banšepieŋ wâc. 19 Erâ nore mâmâc numuhuc jupie Wofuŋzi micnane baafeckeme Biŋebiaŋ soŋsoŋ fowec i asa feferaŋko mutaniŋkezepac. 20 No irec biŋe mumu kâpâcwâruo foekopaczi hâhâwic tâmiric mutaniŋkepe sâckezejec.

Mumutara dâŋ

(Koì 4: 7-8)

21 Juju-nanere fuŋne â gie baekopac i kâuc banšipiŋte Tikikozi fârâ dâŋ binaŋ eŋare-fâreocmu, e âgo biaŋ-nâŋec â Wofuŋte kiŋaŋ qaqa micrereŋhec. 22 Eki nâŋere dâŋ binaŋ eŋarehuc bubiaŋ qaŋareocte sorepe fakac hâcne. 23 Anutu Mamac â Wofuŋ Jesu Kristo eki âgofâc-nane ŋoŋe wama bâfua-ŋarehuc mamanasiŋ-ŋeŋic basanaŋkeme maŋjauŋhec junšepieŋ. 24 Wofuŋ-nâŋec Jesu Kristo erao qohota sanaŋkeeŋgopieŋ ŋoŋerao aki anonoczi fozejec.